घाटावरचा माळ....

 नाही नदी , नाही नाला माळ आमचा कोरडा ,

कधी काळी म्हणे इथे वाहत होता ओढा ...

किती हा उकाडा अन उन्हाच्या झळा ,
पिढ्यानपिढ्या आम्ही सोसल्या दुष्काळाच्या कळा ...

बोडका डोंगर अन बोडकीच दरी ,
असली जरी ओसाड , हीच आमची पंढरी ...

आत्महत्या नाही केली , नाही सोडली जिगर ,
मनगटावर विश्वास आमचा , फोडला मग डोंगर ...

भरून टाकली माती अन ओढून आणला गाळ ,
जिद्द आमची बघून मग ओशाळला दुष्काळ ...

माळ आमचा सुखावला बघून ही नवलाई ,
कोरड्या माळावर बहरली बघा कशी आमराई ...

पिढ्यानपिढ्या दुष्काळाने झालो जरी घायाळ ,
प्रिय असे आम्हास आमचा घाटावरचा माळ ...

🌹🌹सचिन कुंभार 🌹🌹